TURA: Sukrobar salo, India sorkarini Youth Affairs & Sports Ministry-ni ning·o donggipa Tura-ni Nehru Yuva Kendra-ni gita Constitution Day-ko Tura Walbakgre-o donggipa St Luke School-o maniangaha.
Ia program-ko a·bachengatani somoio National Youth Volunteer-rang, Constitution Day-ko maniani miksonganiko chatro chatrirangna talate on·angchengaha aro uni ja·man ia Constitution Day-ko maniani bak gita quiz contest-ko skulo poraienggipa chatro chatrirangna ong·atangaha.
Chatro chatrirangko group A, B, C aro D dolbri dake sualenba quiz competition-ko ong·atangaha aro ia susaanio group A, bang·bate mark-rangko man·enba chegipa ong·aha.
Sing·anirangna aganchaksusaanio chegiparangna St Luke School-ni Principal Fr Lindo T Sangma-ni jakchi boksis aro certificate-rangko suale on·angaha.
Ia Constitution Day-ko maniani bak gita dingtangmancha preamble reading session-koba skulni auditorium-o ong·atangaha jeon, skulni chatro chatrirang, skigiparang aro skulni principal-ba bakko ra·angaha.
Bon·kamao mittelpilani kattarangko skulni principal aganangenba, ia program-ko ong·ate chatro chatrirangna a·songni niamrangko talate on·angahani gimin Nehru Yuva Kendra Sangathan-ko mittelpilangaha.
