TURA: Meghalaya a·dokni gitcham chief minister Dr Mukul Sangma-ko man·chape Congress dolni sak 12 MLA-rang, All India Trinamool Congress (AITMC)-o napanggenchimode National People’s Party (NPP) aro Meghalaya a·dokni manderangna maming nangchakeani dongjawa ine Sombar salo gitcham MDC aro NPP Meghalaya unit-ni ning·o donggipa minority affairs committee-ni vice chairman Sofior Rahman parakataha.
Sofior Rahman-ni parakatani gitade, sak 12 Congress MLA-rangni AITMC-o napanganiara re·baenggipa 2023 bilsini Meghalaya Assembly election-o NPP dolnade maming nangchakeani dongjawa aro ian Congress dolni vote-ko pipraatani gitasan ong·aigen.
“Mamata Banerjee (Didi)-chi dilenggipa AITMC-o sak 12 Congress MLA-rangni napanganiara Conrad Sangma-chi dilenggipa NPP sorkarina maming nangchakeani dongjawa aro ian NPP dolnaba maming nangchakeani dongjawa. TMC dolara Meghalaya a·dokni manderangna maming aiao inani katta dongja. Congress dolni sak 12 MLA-rang TMC-o napangahani gimin da·ode NPP bilakbatsrangaha aro anga na·simangna iako aganenga…2023 bilsini Assembly election-o NPP chegopgipa ong·telgen,” ine Rahman parakataha.
Garo Hills-ni sak 9 Congress MLA-rang TMC-o napanggenchimoba Garo Hills-ni a·kawe jolrango komibatgipa jatrangni vote-rangko sale katna man·jawa maina ia jolo songdongenggipa manderang pilakan a·dokni Chief Minister Conrad Sangma-o, uni dilanio aro NPP-o bebera·gipa manderangsa ong·a ineba NPP-ni dilgipa parakataha.
Rahman-ni parakatani gitade, skango Tikrikilla, Phulbari, Rajabala, Selsella, Mahendraganj aro uandakgipa bang·bata a·kawe jolrangan Congress dolni a·jarangsa ong·genchimoba da·o ia biaprango songdongenggipa gipin jatrang pilakan NPP-nasa chakengaha aro uandaken 2019 bilsini Selsella by-election aro ia bilsini Rajabala by-election-oba Congress dol, NPP-ni jako amchepako man·ahachim.
2023 bilsini Assembly election-o NPP chegopgipa ong·gen ine janapatengon, ‘TMC-er khela hobena, NPP khela dekhabo’ ba ‘TMC-ni kal·anide cholijawa aro NPP-sa kal·e mesokgen’ ine Rahman parakataha.
Sak 12 MLA-rangni Trinamool Cong-o napanganichi NPP-na maming nangchakeani dongjawa: Sofior Rahman
Date:
Share post:
