Shallang-oni Khalu-ona dakgipa PMGSY ramako matchotatchina UAYF dabia

SHILLONG: West Khasi Hills district-ni ning·ogipa Shallang-oni Rengdim gita Khalu-ona PMGSY-ni ning·o tarigipa rama sorok aro dolong rikgiparangko matchotatchina gita United A·chik Youth Federation (UAYF), sorkario daiangaha.
Meghalaya PWD Minister Prestone Tynsong aro joltangni MLA Gigur Myrthong mangna on·gipa memorandum-o janapani gitade, sorkari ia rama sorokko ru·uta bilsirangna tarigija, chong·motan matchote tarigija galchipaha, jeni a·selan a·jolni manderang, mongsongbate wachikarini sommoirango namen neng·nikaniko man·enga, unbaksana ja·achi km 20-30 dakerang chel·e re·enba ani-bajar cha·na ga·akenga ine UAYF aganaha.
Minggipin rama sorokrang namjani a·sel ia songrangna gari gora re·anirangba dongja, jeni a·selan songni nokni manderang uamangni ge·e game man·gipa bolam biterangko an·tangtangan Shallang bajar aro Jadi bajarrangona olbae chilbae palna nangao ga·akenga ineba Federation uamangni memorandumo janapaha.
Unigimin, songni-nokni manderangni neng·nikanirangko chel·atna man·na gita uamangni namgnina, rama-sorokko aro dolongrangko matchote tarie rike on·china gita UAYF, Sorkario mol·molaha.
Iarang baksana a·jolna bijoliko tik ong·china gitaba Federation dabia. Shallangara, West Khasi Hills-o songdonggipa manderangna mongsonggipa bading-chiwalram bajar ong·a, jeon a·jolni bang·a songrangan uamangni janggi tanganina chu·gimik pangchaka. A·jolo dam 300 mang songrang donga, jeon ia a·jolni manderangba, gipin biaprango gitan, salantian, bading chiwalani a·ba, cyber cell, electronic dokan, school authority-rang aro chatro chatrirang electricity-o pangchaka, indakomangba Shallang jolo songdonggipa manderang bijoli siatsimsimaniko chagrongna nangenga, jeni a·selan bang·a neng·nikanirangko man·enga ine Federation janapaha.
Uamangni memorandum-o janapani gitade, Rengdim, Nengdawak, Matchok kan·ram, Wakpangram, Bokchung, Khalu A and Khalu B, Khalu (Garo Hills), Rongtok, Rengchi, Rangram, Seningkri aro Goreng A dakgipa songrangode bijoli man·gijan jasku mang ong·pilengaha, unigimin ia neng·nikanirangko nirokatchina gitaba Federation, A·dok sorkariko didiaha.