NONGPOH: An·tangtangni naljokgnina COVID tikkarangko su·e ra·tokchina gita Ri-Bhoi district-ni Deputy Commissioner, district-tangni manderangna didianiko on·aha. COVID sabisioni gital nakatgipa rokomsa Omicron sabisiko South Africao aro adita European a·songrango rim·a man·engaha, unigimin manderang an·tangtangni naljokgnina mikrak simsaksona nangao ga·akenga aro district administration baksa bakrimaniko on·enba COVID tikkarangko su·e ra·china gita aro an·tangtangna naljoke ra·china gitaba DC mol·molataha.
Ua indakeba aganaha je, a·dokni pilak district-on dingtangmancha mingsa Special Vaccination Campaign-ko a·bachengatchina gita a·dok Sorkari u·iataniko on·manaha. Indake Ri-Bhoi district-o, re’baenggipa December 6 aro 7 tarikrango Umling Bloc-ni pilak Polling Station-rangon COVID tikka su·anirangko dakanggen ineba DC u·iatjolaha. Una agreba Jirang Block-ni Polling Station-rango, 9 aro 10 tarikrango, Umsning Block-ni Polling Station-rango 13 aro 14 tarikrango aroba Bhoirymbong Block-ni Polling Station-rango 16 aro 17 tarikrango Vaccination Campaign-rangko ong·atanggen ine Deputy commissioner u·iatangaha.
