NPP, CAA-ni bidingo North East-ni manderang baksa chadengpaa: Thomas Sangma

SHILLONG: BJP baksa bakrimgipa National People’s Party (NPP), Citizenship Amendment Act (CAA)-ni bidingo chu·gimik North East a·jao donggipa manderangni namgnina  chadenggen ine aganaha.
“Ian North East chu·gimikni mamla ong·a, uni gimin chinga North East-ni manderang baksa ong·paa. Ian chingni party-ni gimin ong·ja, ine NPP National General Secretary aro North Tura-oni MLA Thomas A Sangma aganaha.”
Re·anggipa Robibar salo Parliament-ni Winter Session-ko a·bachengna skang bilo donge kam ka·enggipa NDA-ni ong·atgipa all-party meeting ba tom·anio Tura-oni NPP MP Agatha Sangma-ni CAA-ko ra·pilna dabianio Thomas Sangma, ia uni kattarangko on·ataha.
Uandake NPP-ni sakgni MP-rang donga, saksa Lok Sabha aro sakgipin Rajay Sabha-o donga, uamang Parliament-o CAA-ni gimin aganpaenga.
Sorkari jekai, game ge·e chagiparangni mikkangko nie farm law-ko ra·galaha, ugitan CAA-koba ra·galpilna nanga ine Meghalaya Tura-oni MP Agatha Sangma, sorkariko mol·molaha.
Agatha, sorkarini all-party meeting-o unbaksana BJP-ni dilenggipa National Democratic Alliance (NDA)-ni tom·anio Defence Minister Rajnath Singh aro Union Minister Pralhad Joshi, Piyush Goyal- uamangni dongpaanion CAA-ko ra·galpilchina mol·molangaha.
Niatgenchimode NDA sorkarini farm law-ko ra·galpilaniara, CAA-o ra·galna dabienggipa dolrangna ka·donganiko on·aha. Indake a·dokoni CAA -ko jegalgipa dolrang, uamangni dabianiko ma·mongona ra·angtaina a·bachengataha.