TURA: Tura-ni Nehru Yuva Kendra-ni gita Sukrobar salo, District Level Declamation Contest-ko West Garo Hills a·jani DRDA Conference Hall-o ong·atangaha.
Ia Declamation Contest-ko ong·atanio West Garo Hills aro South West Garo Hills a·jao donggipa block ge·antionin chatro chatrirang bakko ra·angaha aro ia contest ba susaanio bak ra·gipa sakpraknan, dingtangmancha donsogimin katta bichongo pangchake aganchina gita minute 10 somoiko on·angaha.
Ia Declamation Contest-o Tura Don Bosco College-ni Associate Professor Ipshita Roy, apsan college-ni Associate Professor Dr Barbara S Sangma aro apsan college-ni Assistant Professor Dr Arindham Ghosh, judge-rang ong·e bak ra·giparangko niangaha.
Ia Declamation Contest-o skanggipa biapko man·e chegipana gong 5000/-, gnigipana gong 2000/- aro gittamgipana gong 1000/-ko boksis dake on·angaha aro iana agreba chegiparangna trophy aro certificate-rangkoba on·angaha.
Ia program-ko ong·atanio West Garo Hills a·jani Deputy Commissioner Ram Singh-ba dongpae bakko ra·angengon, iandakgipa program-ko ong·atahani gimin Tura-ni NYK-ko mittelpilangaha.
