AMPATI: Re·baenggipa December-ni 13 aro 14 tarikrango South West Garo Hills a·jani dingtang dingtang biaprango COVID-19-ni tikako election-ni bewalo su·na miksongengani gimin Sukrobar salo South West Garo Hills a·jao COVID-19-na songe dongimin District Task Force-ni tom·aniko Ampati-o ong·atangaha.
Ia tom·aniko South West Garo Hills a·jani Deputy Commissioner aro District Task Force-ni Chairman Ch Ramakrishna dilangaha aro tom·anio a·jani ADC SK Marak, ADC AVD Shira, EAC aro BDO-rang, health official-rang aro gipinrangba dongpae bak ra·angaha.
Ia tom·anio District Surveillance Officer-ni jinmana parakatani gitade, da·o dipet South West Garo Hills a·jao tika su·na cholko man·enggipa manderangoni 86.6 percent-ni gita skanggipa pongko su·e ra·mantokaha aro 57.1 percent-ni gita gnigipa pongkoba su·e ra·mantokaha.
Indake ong·genchimoba, tika su·gimin manderangko CoWIN App-o segatanio meligrikjaengani gimin South West Garo Hills a·jani Deputy Commissioner, an·tangni suk ong·gijaniko parakangenba, ia meligrikgijaniko ta·raken namatchina gita medical official-rangko didiangaha.
Tikarangko su·na gita nangani kri polling station-rangko seokna dingtangmancha tika su·gimin aro su·kugijagipa manderangko mesoke dingtangmancha songni bimingrangko segatchina gitaba ua medical officer-rangko didiangaha.
Iani bidingo mikkang antini Bristibar salo apsan tom·e chanchirimtaina gitaba ia tom·anio tik ka·e donangaha.
