TURA: Ma·mong sorkarini ra·gatgipa scheme-rangko West Garo Hills a·jao jako ra·e kam ka·aniko nipilna gita jagittamprako ong·atenggipa DISHA-ni tom·aniko re·anggipa Sonibar salo, Tura-ni MP Agatha K Sangma, video conference gita ong·atangaha aro ia tom·anio West Garo Hills a·jani Deputy Commissioner Ram Singh baksana dingtang dingtang officer-rangba bakko ra·angaha.
Ia tom·anio ma·mong sorkarini ra·gatgipa dingtang dingtang scheme-rang, jekai PMGSY, MGNREGS, PMAY, SBM, SSA, NSAP, NRLM, NHM, Mid Day Meal, Jal Jeevan Mission, PMEGP aro uandakgipa scheme-rangko Tura-ni MP nipilangenba, ia scheme-rangko manderangni namgnina somoi gita aro nama bewalo chu·sokate on·china official-rangko didiataha.
Ma·mong sorkarini ra·gatgipa dingtang dingtang scheme-rangni bidingo chanchirimangengon, kam ka·enggiparangna dormaharangko on·na nangenggipa tangka paisa aro uandakgipa dingtang dingtang neng·nikanirangko dingtang dingtang department-ni officer-rang, Tura-ni MP-na u·iataha aro ua ia neng·nikanirangko ma·mong aro a·dok sorkari baksa agangrike chu·sokatna gita ku·rachakaniko on·ataha.
PMEGP scheme-ko nipilangengon, ia scheme-ko chu·sokgipa ong·atna gita bading chiwalgiparangna dakchakanirangko on·china aro nanga gita nirok sandianirangko dakchina Tura-ni MP, District Commerce & Industries Centre (DCIC) aro bank-rangko ge·etangaha.
Garo Hills-o gital branch-rangko aro ATM-rangko kulie on·an baksana bading chiwalgiparangna loan-rangko on·engani gimin ua dingtangmancha Tura-ni SBI official-rangkoba mittelpilangaha.
MPLAD-koba ia bilsi dipet a·bachengpiltaiahani gimin ua dingtangmancha iani giminba official-rang baksa chanchirimangaha.