TURA: Sombar attamchibara, North Garo Hills a·jani sima jolo donggipa East Garo Hills a·jani Rongmil bazar-ko wa·al kamaha aro ia bazar-ko wa·al kamanio komibeoba dokkan damdokko wa·al kamgopaha.
Kobor on·timgiparangni u·iatani gitade, Sombar attamchibara Rongmil bazar-ni mongsonggipa biapo wa·al kamchakataha aro uandaken ia bazar-o donggipa galamal dokkan dambonga aro cha dokkan damsako chu·gimik wa·al kamgopaha.
Wa·al kama bakan North Garo Hills a·jani Dainadubi-o donggipa aro East Garo Hills a·jani Songsak aro Rongjeng-o donggipa fire service-ni garirangko ia biapona watataha ineba kobor on·aha.
Kobor on·ani gitade, Rongmil bazar-ni dokkan damsao gas leak ong·ani a·selsa ia wa·al kamchakataha aro ia dokkanrangko wa·al kamanio komibeoba lakni lak noksan ong·atako man·tokaha.
Robibar attamosan Jowai-oba JHADC-ni bazar-ko wa·al kamgopahachim aro ia bazar-ko wa·al kamanichi ia bazar-o dokkan dakenggiparang bang·en noksan ong·atako man·tokahachim.
