TURA: Re·baenggipa December 13 tarikoni 18 tarikona Me·mang Koksi Adventures Festival-ko gnigipa changna South Garo Hills a·jani Nongalbibra jolo donggipa A·wemong Simsang Zero Point Camping Site-o ong·attaienga ine kobor on·aha.
Ia festival ba manianiko Nongalbibra Tourism Society baksana Self Help Group-rangni Village Organisation, Ja·ripbonchi Adventure Tour aro All Garo Hills Tourist Guide & Tour Operators Association nangrime ong·atenga.
Nongalbibra Tourism Society-ni president Digros D Shira-ni u·iatani gitade, Me·mang Koksi-ko Garo Hills-ni dingtang dingtang biaprango aro A·wemong songo bang·en nikna man·genchimoba iani bidingo manderang name ma·sitokjani a·sel da·o ia Me·mang Koksi gimaroroangengahani gimin manderangna mikrakataniko on·na miksonganio ia festival ba manianiko Me·mang Koksi Adventures Festival ine bimingko done ong·atenga.
Ia festival-ko ong·atanio, a·bri doe biap niani, Paramotoring & Paragliding, Zip Lining, Paintball Shooting, Simsang River Rafting, River Boating, Offroad cycling, Beach Volleyball, Cultural Program aro uandakgipa dingtang dingtang program-rang donggen ineba u·iataha.
