TURA: September jaonin Selsella C&RD Block-ni Block Development Officer (BDO)-ko ra·galchina dabiengoba da·onan maming ja·kurangko de·kujaengani gimin Selsella jolo donggipa dingtang dingtang NGO-rang, chong·motan ASWA Selsella CAB, ASWA Bhajamara, GSMC Balachanda unit aro GSMC Selsella unit, salsni somoiko sorkarina on·angenba, ia salsnini gisepo Selsella BDO-ko gipin biapona ra·jitangjagenchimode aino pangchake jingjengatna a·bachengatgnok ine mikrakataniko on·angaha.
Selsella Block-ni BDO-ko ra·galchina gita dabie ia dolbri NGO-rang, re·anggipa September jani 22 tarikon a·dokni Chief Minister-na sedoatahachim aro uni ja·man October jani 12 tariko Selsella Block office mikkango jingjengatanirangko dakangahachim ine nikna man·a. Indake ong·genchimoba, da·o December ja ong·pilona kingkingan sorkari maming ja·kurangko de·kujaenga ine NGO-rang matnangatenba, ia officer-ko salsnini gisepon gipin biapona ra·jitangchina dabiangtaiaha.
Selsella block-ni BDO kamtangchi re·a tik ong·jaengani a·sel dingtang dingtang kamrangko ka·anio songni nokni manderang neng·nikanirangko chagrongna nangtokenga aro VEC secretary-rangni, job card holder-rangni aro Selsella jolo songdongenggipa manderangni bang·a kamrangan matchotchipna man·jaenga ine NGO-rang matnangtokengachim.