BAGHMARA: A·gilsakni gipin biaprango gitan South Garo Hills a·jaoba District Legal Service Authority (DLSA), District Medical & Health Office, District Social Welfare Office, One Stop Centre aro dingtang dingtang skulrango poraienggipa chatro chatrirang nangrimenba, World AIDS Day-ko Baghmara-ni Bong Bazar-o maniangaha.
Ia salko maniani bak gita pringni bako Rangku Memorial Girls Higher Secondary School-ni chatro chatrirang, Bong Bazar-ona jinma re·jomaniko ong·atangaha.
Ia World AIDS Day-ko manianio South Garo Hills a·jani Chief Judicial Magistrate Daniel S Marbaniang, jinmana aganprakangengon, bilsiantian ia World AIDS Day-ko December-ni 1 tariko, manderangna HIV/AIDS-ni gimin mikrakataniko on·na manienga ine parakangaha.
Ia salko manianio red ribbon ba ribbon gitchakko ganani bidingo jinmana talataniko on·angengon, ian HIV/AIDS man·gipa manderangna bakrimaniko mesokani chin ong·enga ine Marbaniang parakangaha.
Ia program-ko ong·atanio One Stop Centre aro Jongkol Youth Group-ni membor-rang, maikai AIDS sabisiara batrikrikna man·achim aro maikai ia sabisiko champengna man·gen, uarangni gimin dakmesokangaha.
Ia program-ko ong·atanio dongpae jinmana aganprakanggipa gipin manderangara, Baghmara ICTC-ni DTO In-charge John Beril K Marak, South Garo Hills-ni WPSI Respina A Sangma, South Garo Hills-ni CI Subir S Sangma aro gipinrang ong·a.
