SHILLONG: Nagaland a·doko sak 13 dosgri manderangko sipai dolrangni so·ote galanina dingtang dingtang NGO-rang salgro salaram a·dokrangoniko Armed Forces (Special Powers) Act (AFSPA)-ko ra·galchina dabitokengon, ia Act ba niamko ra·galchina gita Meghalaya a·dokni Chief Minister Conrad K Sangma, Cabinet Minister James Sangma, Congress Legislature Party (CLP)-ni dilgipa Ampareen Lyngdoh aro Ampati-ni MLA Miani D Shira-ba dabiangtokaha.
Salgro salaram a·dokrangoniko AFSPA-ko ra·galpilchina gita ma·mong sorkariko didiatengon, salgro salaram a·dokrango bobil dake chakatgipa dolrangko warachakna gita ia niamko ru·uta bilsirangna skangonin ra·gatahaoba maming namgni dongjaenga aro batesa salgro salaram a·dokrango songdongenggipa manderang neng·nikanirangko chagrongna nangtokenga ine a·dokni Chief Minister Conrad Sangma parakatenba, ia niamko ra·galatpilchina gita ma·mong sorkariko didiataha.
Nagaland a·doko ong·anggipa a·selko a·dokni Health Minister James Sangma-ba jegalatengon, jolo songdongenggipa manderangko chel·chaknasa sipai dolrangko dongenchimoba iandake ramram dosgri manderangko so·ote galaniara namen ra·chakna man·gijagipa kam ong·aha ine parakataha. Nagaland a·doko sipai dolrangni dosgri manderangko so·ote galani bidingo ning·tue am·sandichina gitaba ua dabiangaha.
Apsan daken, Congress Legislature Party (CLP)-ni dilgipa Ampareen Lyngdoh-ba ia a·sel ong·aniko jegalatenba, salgro salaram a·dokrangoniko AFSPA-ko ra·galsrangchina gita dabiangaha.
