SSA skigiparangni bangki dormahako Dec 20-ni gisepo on·jaode kamrangko ka·jawa: MSSASA

SHILLONG: Krismas aro Bilsi Gitalni salrang sokbaengahani gimin Meghalaya a·dokni Samagra Shiksha Abhiyan (SSA) skulrango skigipa-rangna, uamangni man·na nangkuenggipa bangki dormaharangko re·baeng-gipa December 20 tarikni gisepon on·china dabie, Meghalaya SSA Schools Association (MSSASA), a·dok sorkarina sedoattaiaha.
MSSASA-ni president Aristotle C Rymbai-ni parakatani gitade, SSA skulrango skigiparangna jagittamni dormaharangko on·kujaengani gimin aro da·o Krismasni somoiba ong·engahani gimin uamang an·tangtangni man·na nangkuenggipa dormaharangni bidingo sorkariko gisik ra·atpiltaina nangnikaha.
“Skigiparang, August, September aro October jani dormaharangkoba man·-kujaengani gimin ia dormaharangko December 20 tarikni gisepon on·china gita mol·mole a·dok sorkarina sedoattaienga. Chingni on·gimin tarikni gisepo skigiparangni dormaharangko on·ja-genchimode chinga ‘Non Cooperation Movement’-ko dake December 21 tarik dipetan chingni pilak kamrangkon dontongat-gnok,” ine MSSASA-ni president parakataha.
Re·anggipa November-ni 16 tarikoba association-ni dilgiparang, Education department-ni Secretary-ko gronge, skigiparangni bangki dormaharangko Krismasna skangan on·china didiangahachim ine nikna man·a.
Skigiparangni man·na nangkuenggipa bangki dormaharangko December 20 tarikni gisepo on·genchimode skigipa-rang, December 22 tarikoni January 14 tarikona a·dokni Chief Minister aro Education Minister-na letter campaign-ko dake jingjengat-anggen aro uni ja·man January 21 tariko jinma mombati so·e kalimaniko dakanggen ineba MSSASA-ni president parakataha.SSA skigiparangni bangki dormahako Dec 20-ni gisepo on·jaode kamrangko ka·jawa: MSSASA