WILLIAMNAGAR: Re·anggipa Robibar salo, Pa Togan Nengminja Sangma-ni chang 149-gipa siani salko Chisobibra-ni Togan Memorial Park-o maniangaha aro ia salko manianio Chief Minister-ni Adviser Thomas A Sangma, mongsonggipa sokgipa ong·e bakko ra·angaha.
Ia tom·aniko ong·atanio Chief Minister-ni Adviser aro North Tura-ni MLA, jinmana aganprakangengon, Pa Togan Nengminja-ni ka·dongbee British sipairangko warachaksoanio janggitangko gimaatna nangahani gimin jinmana gisik ra·atpilaniko on·angaha. A·dok aro a·songo songdongenggipa manderangni namgnina on·gilanirangko dakaniara a·songo songdongenggipa mande sakantini daitoan ong·a ineba ua aganaha.
Ia tom·anio Meghalaya sorkarini Chief Whip aro Williamnagar-ni MLA Marcuise N Marak-ba dongpae jinmana aganprakangengon, bilsiantian Pa Togan Nengminja-ni siani salko manidilrongengani gimin Pa Togan Sangma Mahari Association (PTSMA)-ko mittelpilangaha. A·dokni tom·tomanina aro namroro silroroanina pilakkon ku·cholsan ong·e kamko ka·china gitaba ua didiangaha.
Ia salko manianio Manme Marak, Pa Togan Nengminja-ni janggi tangani gimin poraiataha aro Samanda-o donggipa St George School-ni chatro chatrirang, a·songna ring·mittelangskaaha.
Rimchaksoani kattarangko East Garo Hills a·jani Extra Assistant Commissioner YW Momin aganangaha aro mittelpilani kattarangko PTSMA-ni general secretary John Sangma aganangskaaha.
Pa Togan Nengminja-ni siani salko maniani bak gita dingtangmancha jatni kal·susaanirangkoba ong·atangaha.
Pa Togan Nengminja-ni chang 149-gipa siani salko Chisobibra-o manianga
Date:
Share post:
