SHILLONG: World Bank-ni a·dokna dakchake on·enggipa dingtang dingtang scheme-rangko nipilna gita Mongolbar salo, a·dokni Deputy Chief Minister aro PWD (Roads)-ni Minister Prestone Tynsong, dingtang dingtang department-ni officer-rang baksa tom·aniko ong·atangaha.
Ia tom·a matchotani ja·mano kobor ra·timgiparangna talataniko on·angengon, World Bank-ni dakchake on·gipa gong kror 554.67 tangkarangchi a·dok sorkari, ming 12 project-rangko a·bachengaha aro ia project-rangko re·baenggipa 2022 bilsini bon·angchibara matchotna ka·dongenga ine Tynsong parakataha.
Deputy CM-ni aganani gitade, ia ming 12 project-rangoni ming 10-de kilometre 262.4 ong·gipa ramarangko tariani project-rang aro minggnide dolong tariani project ong·a. Ming 10 rama tariani project-rangoni mingbongade Garo Hills-o aro mingbongade Khasi Hills-o ong·a ineba ua aganaha.
Ia ming 12 project-rangko a·bachengna gita World Bank, 2020 bilsio Meghalaya Integrated Transport Project (MITP)-ni ning·o gong kror 554.67-ko chame on·aha ineba Deputy Chief Minister parakataha.
“Chinga ia project-rangko 2022 bilsini December jaode matchotatna ka·dongenga,” ine ua aganaha.
Ia kamrangko jako ra·e ka·enggipa contractor-rangni neng·nikani aro ra·bianirangkoba ia tom·anio sorkari nipilangaha ineba Deputy Chief Minister aganaha.
Tynsong-ni aganani gitade, environment aro forest NOC-rangko man·anian contractor-rangni mongsonggipa ra·bianirang ong·enga aro ia neng·nikanirangko namatna man·na gita ua mikkang antioba official-rang baksa tom·e chanchirimangtaina sienga.
Kamrangko somoi gita matchotatna man·na gita gisepgrikode apsan daken kamrangko nipilroroanggen ineba Tynsong parakataha.
Ia tom·anio Finance department-ni Commissioner & Secretary Vijay Kumar, PWD-ni official-rang aro project-rangko jako ra·e ka·enggipa contractor-rangba bakko ra·angaha.
