SHILLONG: Ja·manchake koborko man·soani gitade, re·anggipa Sonibar salo, South West Khasi Hills a·jao donggipa Amarsang songni saksa Paulus G Momin minggipa mande saksako, Wala Amarsang songo ma·sina man·gijagipa manderang so·ote galaha.
Iani bidingo sianggipa mandeni jonggipa Louis G Momin, police-rangna kobor on·eaha aro koborko man·soa bakan police-rang ua biapona re·ange so·otako man·gipa mandeko nieon, uni nachil samgnion mata bu·ani chinrangko nikaha indiba uni be·enrangode maming mata bu·ani chinrangko nikskajaha.
Ia a·sel ong·ani somoio so·otako man·gipa mandeni jikgipaba uni segipa baksa dongachim aro uni police-rangna parakani gitade, ua somoio uamang Nongstoin-oni noktangchi re·angpilengmitingo ma·sina man·gijagipa manderang, mikkangchipakchi Gypsy gario re·bae uamangko Wala Amarsang songo champengsoaha ine kobor on·timgiparang parakataha. Gypsy garioni mande sakgittam ong·onenba, uni segipako garioniko ong·onchina aganaha indiba jikgipade kenjagokenba, ua biaponi katange ia a·selni bidingo songni manderangna aganeskaaha ineba kobor on·timgiparang parakataha.
So·otako man·gipa mandeni jikgipa songni manderangna aganeoba songni manderang uni segipako sandina re·bana gita jechaktokaiaha aro uandaken pringni 5:30 bajimango uamang uko sandiangon, uko ua apsan biapon sie dongakosa nikeaiaha ine kobor on·timgiparang parakataha.
