SHILLONG: Skigiparangni politics-o bak ra·aniko champengna gita dingtangmancha sorkarini u·iataniko on·ahani gimin Meghalaya a·dokni opposition Congress dolba, sorkariko sing·doangaha.
Congress Legislature Party (CLP)-ni dilgipa Ampareen Lyngdoh-ni parakatani gitade, Meghalaya a·doko skangonin skigiparangba politics-ni kamrango bak ra·pana gita jakgitel ong·giparang ong·achim aro da·o skigiparangni politics-ni kamrango bak ra·aniko sorkarini champengataniara skigiparangna on·gimin jakgitelaniko pe·ani gita ong·engachim.
“Skigiparangni politics-o bak ra·aniko champengataniara sorkario adita sing·na nanganirangko ong·kataha maina skangonin a·doko skigiparangba jakgitele politics-ni kamrangko ka·pana man·engachim,” ine Lyngdoh aganaha.
A·dok sorkarini iandake rang·gitik u·iataniko on·aniara manderangni gisikrango sing·anirangko ong·katatani gita ong·aha ineba ua aganaha.
“Skigiparangni politics-o bak ra·anio uamangni skie on·anirango maming nangchakeanirang dongjaenga ong·ode ba uamang skulrangchi re·e kamtangtangko ka·enga ong·ode skigiparangni bak ra·anio maming neng·nikanirang dongna nangjachim ine anga an·tangde chanchia. Uamang sorkarini dormaharangko cha·eba kamtangtangko name ka·jaenga ong·osa politics-o bak ra·anikode champengna nangao ga·akengachim,” ine Lyngdoh aganaha.
Congress dolni dilgipa Ampareen Lyngdoh an·tangba, politics-ona re·bana skang saksa skigipani kamko ka·gipa ong·achim ine nikna man·a.
