TURA: Meghalaya a·doko gitcham chief minister Mukul Sangma-ko man·chape sak 12 Congress MLA-rangni All India Trinamool Congress (AITC)-o napangani ja·man Garo Hills-o da·oba dingtang dingtang biaprango Congress dolna kamko ka·enggipa manderang aro dingtang dingtang block committee-ni membor-rang, bang·en AITC-o katnaptokkuenga ine nikna man·aha.
Adita salrangna skangsan, Garo Hills Autonomous District Council (GHADC)-ni sak 11 Congress MDC-rangba AITC-o napangtokahani gimin da·o GHADC-o Congress membor-rang saksaba dongjahachim. Iani ja·mano Mukul Sangma-ni dilanichi, Garo Hills-ni dingtang dingtang biaprango AITC-ni tom·bimonganirangko ong·ate Congress dolni gitcham membor-rang pilakkon AITC-ona rimnaptokaha aro Meghalaya a·doko da·o AITC-ko ka·sinsin bilakbaroroatna man·engahachim.
Uandaken, Sonibar saloba AITC-ni tom·bimonganiko Dalu jolo donggipa Koinadubi songo ong·atangtaiaha, jeon Congress dolna kam ka·enggipa ritchani ritcha membor-rang AITC-o katnaptokaha. AITC-o katnapgipa Congress dolni gitcham membor-rangara, Block Congress, Mahila Congress aro Youth Congress-ni membor-rang ong·achim.
Ia tom·bimonganio a·dokni gitcham chief minister aro Meghalaya a·doko AITC-ko dilenggipa Mukul Sangma baksana gipin dilgiparangba bakko ra·angtokaha.
Iana skang, Sukrobar saloba AITC-ni tom·bimonganiko Rangsakona constituency-ni ning·o donggipa Dumnigaon Community Hall-o ong·atangahachim aro ia tom·bimonganioba Rangsakona constituency-ni ning·o donggipa Block Congress Committee-ni membor-rang, AITC-o napangtokaha.
Ia tom·anirango AITC-ni gital dilgiparang jinmana aganprakangtokengon, an·tangtangni Congress doloni ong·kate AITC-o napangani gimin talataniko on·angenba, mikkangchi AITC-ko bilakatrorona gita bakrimaniko on·china manderangko didiangtokaha.
2023 bilsini Assembly election-o maming jajaani grian AITC chegipa ong·e gital sorkariko rikna man·gnok ineba AITC-ni dilgiparang parakangtokaha.
Garo Hills-o Congress-ni dilgiparang Trinamool Congress-ona katnaptokkuenga
Date:
Share post:
