TURA: COVID-19 giproroengani a·sel manderang bilsi gimik neng·nikanirangko chagrongna nangtokahaoba da·o Krismas sokbataiahani gimin Garo Hills gimikon Krismasko rimchaksona gita tarisamsotoktaiaha.
Tura-ni dingtang dingtang biaprangchi re·roroe nigenchimode nitobee teng·atanirangko, manderangni jakchakpilgija koros ka·anirangko aro an·tangtangni tangka paisarangko okna gita ATM-rango ro·bee riting dakanirangko nikna man·taiengaha.
COVID-19 sajinmani a·sel bang·a manderangan janggi tanganio neng·nikanirangko chagrongna nangtokahaoba da·o Krismas sokbaahani gimin pangna bilsi dakronga gitan Garo Hills-o manderang Krismasko manina kusi ong·bee nichaksotokengaha.
Tura-o dal·batsranggipa koros ka·chakani biap Tura Super Market-oba pringnian manderangni apchangketaniko nikna man·engaha aro dokkanrango paltimenggiparangba manderangna dangdike on·anio mitamrangde nom·bokpilna gita nangenga.
Gari gorarangni re·ruraanirangko niatgenchimode batanggimin salrangonin Tura-o apchangket ong·bataniko nikna man·aha aro Tura bazar-o gari donchakna biaprang chu·ongjaengani gimin pangna bilsi dakronga gitan Police-rangba, Police Parade Ground-ko gari donchakna gita on·skaengaha.
Garo Hills-ni dingtang dingtang biaprangoni Tura-ona re·bae poraienggipa chatro chatrirangba da·o Krismas aro Bilsi Gitalna songtangtangchi re·pilangtokengaha aro mitam bi·sarangkode ma·a paarang an·tangtangan re·bae rimpilangtokaha.
Garo Hills-ni pilak biaprangon Krismasni salo chrokna gita pasarangkoba riksotokaha aro uandaken attamantian manderang kusi ong·e ia pasarangon chrok mesae rona a·bachengtokaha.
Photo: Krismasna Goeragre-o tarisogimin decoration ba taritilonganiko nikna man·enga. Noksa: John Davict Sangma