SHILLONG: Meghalaya a·doko niam gri koela bikotani aro salruraaniko champengna gita sorkari rakbee kamrangko ka·engoba champengna man·jaenga ine MDA-o bak ong·paenggipa United Democratic Party (UDP) a·kangataha.
UDP-ni general secretary Jemino Mawthoh-ni parakatani gitade, a·doko niam gri koela bikotani aro salruraanirangko champengna sorkari jotton ka·engachim indiba a·dokni koela a·damrango niam gri koela badinganiko champengna man·jaenga.
“Angade manderangni seokako man·gipa mandeba ong·ja aro sorkarini kamna chake aganengaba ong·ja indiba angni aganna miksonganide a·doko niam gri koela bikotani aro salruraaniko champengna gita sorkariba raken kamde ka·engachim indiba an·ching pilakan niam gri koela badinganirangko nikna man·kuenga,” ine Mawthoh aganaha.
Meghalaya a·doko niam gri koelarangko badingna man·engani a·selan bobil dake chakatgipa dolrangko bikotna cholko on·ani gita ong·enga ine adita salrangna skang, All India Trinamool Congress (AITC)-ni dilgipa Mukul Sangma aganenba, a·doko niam gri koela badinganiko champengchina sorkariko didiahani gimin UDP-ni general secretary, ia kattarangko talate on·angskaaha.
Niam gri koela bikotenggipa aro salruraenggipa manderangni kosako rakgipa ja·kurangko de·na nanga ineba Mawthoh aganaha.
“A·dok sorkari rakgipa niamrangko ra·gataha aro iandakgipa kamrangko ka·enggipa manderangko rim·na nanga,” ine UDP-ni dilgipa aganaha.
Niam gri koela badinganio politics-ni gita jak dongama dongja ukode ua name ma·sija ineba Mawthoh aganaha.