TURA: East Garo Hills a·jani Williamnagar jolo donggipa Rongongre songo skanggipa changna Songkritan chroksusaaniko re·anggipa December 28 tariko ong·atangaha.
Ia Songkritan chroksusaaniko Rongongre Youth Reunion Club ong·ataha aro ia chroksusaaniko ong·atna gita Williamnagar-ni MLA Marcuise N Marak dakchake on·aha.
Ia Songkritan chroksusaanio gimik dol 8 chrokgipa dolrang bakko ra·angaha aro nambatgipa dolrangna boksisrangko on·angaha.
Ia Songkritan chroksusaaniko a·bachengatna skang, Williamnagar-ni MLA Marcuise Marak, jinmana aganprakangengon, ia sal somoirango A·chikrang, chengo ma·gitcham pagitchamrangni dakbewal rikbewalko ja·rikjae, ka·sinsin gimaroroatengaha ine an·tangni suk ong·gijaniko parakatenba, Krismasni somoirango skango gitan Songkritan chrokaniko dakangkuchina didiangaha.
