SHILLONG: Gipin political dolrangni bakrimani griba a·dokni nangchongmotgipa kamrangko chu·sokatna gita National People’s Party (NPP)-chi dilenggipa Meghalaya Democratic Alliance (MDA) sorkario chu·onga gitan bilrang donga ine NPP-ni dilgipa aro Meghalaya a·dokni Deputy Chief Minister Prestone Tynsong parakataha.
A·doko nangchongmotenggipa kamrangko chu·sokatna gitasa Congress dol, MDA sorkarina chakpaaniko on·enga ine adita salrangna skang Congress dolni dilgiparang aganahani gimin ia kattarangko Tynsong parakatskaaha.
Sorkarini kamrango Congress dolni bakrimaniko on·na nangnikaniko uamang ra·chaka indiba Congress dolni bakrimani griba a·dokni nangchongmotgipa kamrangko chu·sokatna gita MDA sorkario chu·onga gitan bilrang donga ine Tynsong parakataha.
“Oe chinga mitam Congress MLA-rangni soi ka·e on·atgipa chittiko man·soaha indiba uamang a·palo donge sorkarini kamrango bakrimaniko on·nasa aganahani gimin chinga mamingkoba aganchakjaha,” ine Tynsong talataniko on·angaha.
“Uamang (Congress) chingni kosako kam ka·genchimoba chingade kamtangko ka·angaigen maina ian MDA sorkarini daito ong·a. Na·song chingna chakpaaniko on·bo on·jabo chingade a·dokni manderangna dangdike on·nasa kam ka·enga,” ine a·dokni Deputy Chief Minister parakataha.
A·doko Inner Line Permit (ILP)-ko ra·gatchina dabienggipani bidingo aro Constitution-ni Eighth Schedule-o Khasi aro Garo ku·sikrangko ra·gatchina dabiengani bidingo Congress dol, MDA sorkarina bakrimaniko on·enga ine adita salrangna skangsan Congress dolni dilgiparang parakatahachim.
BJP dongenga dipetde MDA sorkari baksa bakrimjawa ineba adita salrangna skangsan, Congress dolni working president PN Syiem parakatskaahachim ine nikna man·a.
