SHILLONG: Assam aro Meghalaya a·dok damgni simarango meligrikna man·jaenggipa biaprangni bidingo East Jaintia Hills regional committee-ni am·sandie tarigimin report-ko bilsi gital maniani ja·mansa sorkarina on·anggnok.
Ia regional committee-ni report-ko tarina gita somoiko bi·dapahani gimin sorkari, ia committee-ni report-ko December 31 tarikni gisepo on·china gita somoiko on·dapahachim. Ri Bhoi aro West Khasi Hills district committee-ni report-rangkode Meghalaya a·dokni Chief Minister Conrad Sangma-na on·manskaahachim.
East Jaintia Hills regional committee-ni membor aro a·dokni Home Minister Lahkmen Rymbui-ni kobor ra·timgiparangna parakatani gitade, ia committee-ni report-ko da·o tarimanaha aro jensalo a·dokni chief minister, Shillong-ona re·bapilahaon aro chuttini ja·man sorkari office-rangko kulipilahaon uamangni report-ko sorkarina on·gnok.
Da·o dipet East Jaintia Hills regional committee aro Assam-ni committee, agangrikanirangko dakengkua aro dolgni apsan chanchirimanirang matchotahaon report-ko chapa ka·e sorkaritangtangna on·gnok ine adita salrangna skangsan Meghalaya a·dokni Chief Minister Conrad Sangma aganahachim.
Meghalaya aro Assam a·dokni gisepo meligrikna man·jaenggipa dam 12 songrangoni damdok biaprangko skanggipa bako namatchengna a·dok damgnini chief minister-rang tik ka·manahachim aro ia biaprangara, Meghalaya a·dokni West Khasi Hills, Ri Bhoi aro East Jaintia Hills a·jani ning·o donggipa Tarabari, Gizang, Hahim, Boklapara, Khanapara-Pilangkata, Ratacherra aro Assam a·dokchipakni Cachar, Kamrup Metro aro Kamrup a·jarang ong·engachim.
