SHILLONG: Manipur a·dokoba skanggipa changna Omicron man·gipa dongahani gimin Meghalaya a·dokoba gittamgipa COVID-19-ni giproroanina nanga gita kamrangko ka·soengaha ine kobor on·aha.
Health department-oni koborko on·ani gitade, Shillong songjinmaoba gipin a·doko Omicron man·gipa mande baksa contact dongimin ong·e kenchakna nangani ong·enga aro ia mandeko salsnina dingtang biapo donenga. Da·o dipet ia mandeko COVID-19-na porikka ra·anio negative ong·engkua ineba kobor on·timgiparang parakataha.
Indake ong·engon, Shillong songjinmao donggipa North East Indira Gandhi Regional Institute of Health & Medical Sciences (NEIGRIHMS)-oba ia sabisini giprorotaianiona tarisamsoanirangko dakengaha ine kobor on·aha.
Batanggimin changgnina COVID-19 giproroani somoioba ia NEIGRIHMS-an, sabisiko warachakna gita rakbee kamrangko ka·ahachim ine nikna man·a.
NEIGRIHMS-ni Director Dr Nalin Mehta-ni parakatani gitade, uamang gittamgipa changna COVID-19-ni giproroanina kamrangko ka·soengaha. COVID-ni niamrangko bilakbate ja·rikchina gita ia institute-ni doctor-rang aro nurse-rangnaba mikrakataniko on·manaha ineba Dr Mehta aganaha.
NEIGRIHMS-o da·o dipet chu·onga gitan oxygen aro ICU-rang dongenga aro kam changgipa manderangba donga ine janapatengon, “Gittamgipa changna COVID-ni giproroaniko champengna man·genchimode an·ching bang·a janggirangkon jokatna man·gen,” ine Dr Mehta parakataha.
Manderangko tika su·e ra·china didiatengon, bi·sarang Omicron rokomko man·ningbata ine chinrang dongani gimin hospital-ni Paediatic department-ko name tarisamsochina gita ge·etaniko on·manaha ine NEIGRIHMS-ni Director parakataha.
COVID-19-ko warachakna dongimin niamrangko ja·rikchina aro nangchongmotana agre skatang nokoni ong·katjachina gitaba ua a·doko songdongenggipa manderangko didiataha.
