SHILLONG: Re·baenggipa January 21 tariko Meghalaya a·dokni bilsi 50 gapaniko maniaona a·songni Prime Minister Narendra Modi-koba re·bae bak ra·echina gita okamatahaoba da·o dipet ua re·bagenma re·bajawa name aganna man·kujaenga ine a·dokni Deputy Chief Minister Prestone Tynsong parakataha.
Tynsong-ni parakatani gitade, a·dokni Chief Minister Conrad K Sangma an·tangan a·songni Prime Minister-koba Meghalaya a·dokni bilsi 50 gapaniko manianiona okamatahachim.
“PM office-oni chingna u·iataniko man·sokujaskal chinga uni re·bagniko name aganna man·kujawa,” ine Deputy Chief Minister aganaha.
Meghalaya a·dokni bilsi 50 gapaniko manianio dongpae do·ga oe on·na aro a·dokni mongsonggipa project-rangna pangchakanirangko songe on·na a·dok sorkari, a·songni Prime Minister-ko nichaksoengachim ineba Tynsong aganaha.
Iani bidingo talataniko on·china agananon, “Da·o dipet anga na·simangna chu·gimikko talate on·na man·kujawa. Haida January jani skanggipa antio, chief minister an·tangan na·simangna ia pilakni gimin talataniko on·naba gnang aro Prime Minister basako sokbagen, tarikkoba agannaba gnang,” ine Deputy Chief Minister aganaha.
Meghalaya a·dokni bilsi 50 gapaniko maniani bak gita ming 50 project-rangko a·songni Prime Minister-chi a·bachengatna gita a·dok sorkari tarisamsoenga ine adita salrangna skangsan Chief Minister parakatahachim.
