SHILLONG: Meghalaya a·doko Inner Line Permit (ILP)-ko ra·gatna dabianiko ma·mong sorkari knachakna gisiko nangjaengani gimin rakbatgipa ja·kurangko de·e dabiangkugen ine Khasi Students Union (KSU) parakataha.
KSU-ni president Lambokstar Marngar-ni u·iatani gitade, COVID-19 sajinmani a·sel bilsisana baten ILP-na dabianio nangchakeanirangko man·na nangaha.
“ILP-na dabiani bidingo chinga songni nokni dilgiparang baksaba agangrikaha aro uamangba a·doko ILP-ko ra·gatchina nangniktokenga,” ine Marngar aganaha.
Marngar-ni parakatani gitade, Meghalaya a·dokna ILP-ko dabiani bidingo ma·mong sorkari name niengkua ine agananiara a·dokni manderangko mikchepani gitasa ong·engachim.
Ma·mong sorkari pilaknan apsan daken dangdike on·na nanga ine janapatengon, “Manipur a·dokan ILP-ko man·aha ong·ode maini gimin Meghalaya a·dokara man·skajaenga?” ine KSU-ni president sing·doangaha.
“Chinga dingtang nisanko ba dingtang niamrangko dabienga ong·ja indiba Indian Constitution-ni ning·on ILP-kosa dabiengachim. ILP-ko ra·gate on·genchimode ian a·doko songdongenggipa Tribal-rangko chel·chakna dakchakani ong·genchim,” ineba ua aganaha.
Meghalaya a·doko songdongenggipa manderang jingjengatna nanggijan ILP-na dabianiko ma·mong sorkari knachakchongmotgen ineba ua an·tangni ka·dongchakenganiko parakataha.
