HILLONG: Meghalaya a·doko Inner Line Permit (ILP)-ko ra·gatchina dabianiko ma·mong sorkari knachakchina gita a·dokni dingtang dingtang dolrangko jingjengattaichina Bristibar salo, Meghalaya a·dokni Community & Rural Development (C&RD) Minister didiangaha.
U Kiang Nangbah-ni chang 159-gipa siani salko Khasi Students Union (KSU)-ni gita manidilani somoio jinmana aganprakangengon, a·dokona niam gri napsrukanirangko champengna gita ru·uta bilsirangonin a·doko rakbatgipa niamko ra·gatchina dabitokengachim ine C&RD Minister aganaha.
“An·ching ru·uta bilsirangonin ILP-ko ra·gatchina dabiengachim indiba ma·mong sorkari, a·doko songdongenggipa manderangni dabianiko knachakna gisiko nangjaenga,” ine Dohling aganaha.
A·dokni C&RD Minister Hamletson Dohling-ba skango KSU-ni general secretary ong·e kamko ka·ahachim ine nikna man·a.
Dohling-ni aganani gitade, Eastern Bengal Frontier Regulation Act 1873-ko dabie jingjengatanio bang·a chadamberangkon police-rang dokahachim.
“A·dokni chadamberang indita duk saknaako chake ILP-ko dabiengoba da·onan be·en pil·na man·kujaenga,” ine ua aganaha.
A·dokni minister ong·e ua ILP-na dabienggipani bidingo Chief Minister Conrad Sangma-chi dilenggipa Cabinet-o agan-janappana cholko man·aha ineba C&RD Minister parakataha.
Dohling-ni aganani gitade, a·dokni Cabinet-ba ILP-ko dabienggipa NGO-rang baksa Delhi-ona re·ange ILP-ko ra·gatna nangengani gimin ma·mong sorkari baksa agangrikahachim aro Assembly-oba ia Eastern Bengal Frontier Regulation Act 1873-ko ra·gatchina ma·mong sorkario dabina gita resolution-ko ra·manahachim indiba ma·mong sorkari da·onan iani bidingo maming ku·rachakanirangko on·kujaengachim.
Sorkarini gita uamang ILP-ni bidingo ma·mong sorkari baksa agangrikangkugen ineba ia tom·anio a·dokni C&RD Minister ku·rachakaniko on·angaha.