SHILLONG: India a·songni dingtang dingtang biaprangoba COVID-19-ni gital Omicron rokom giproroengahani gimin Meghalaya a·doko ia sabisiko warachaksona gita a·dok sorkari, January 5 tarik dipet adita niamrangko ra·gattaina siengaha ine Sombar salo, a·dokni Chief Minister Conrad K Sangma parakataha.
Sombar salo, a·doko ong·enggipa obostarangko nipilna gita tom·aniko ong·atangani ja·man kobor ra·timgipa manderang baksa agangrikengon, a·dokni dingtang dingtang biaprango jinma tom·bimonganirangko champengna gita sorkari tik ka·angaha ine Chief Minister parakataha.
Da·o dipet Meghalaya a·dokode Omicron rokomko man·ani bidingo kobor dongkujaengani gimin jinma tom·bimonganirangko champengate ia sabisiko warachakna nangengaha ineba Sangma aganaha.
Shillong songjinmao private garirangni re·ruraanikoba adita champengatna tik ka·angaha ine janapatengon, manderangni skatang ong·kataniko champengna gita Shillong-o private garirangna odd-even bewalo garirangko re·rurana on·na gita sorkari tik ka·angaha ine Chief Minister parakataha.
Gipin biaprangoni Meghalaya a·dokona re·napbaenggipa manderang, Covid-ni tika ponggniko su·mangiminrang ong·an baksana konta 72-ni gisepo RT-PCR test ka·e negative ong·ani report-ko mesokna man·na nanggen aro ia report-ko mesokna man·jagenchimode a·dokni nakuramo porikka ra·e nitaina nanggen ineba Chief Minister parakataha.
Shillong songjinmao aro a·dokni pilak a·jarangon night curfew-ko walni 10:00 baji dipet ra·gattaignok ineba Chief Minister parakataha.
Iani bidingo a·jatangtangni deputy commissioner-rang, nanga gita ge·etanirangko on·anggen ineba ua parakataha.
