SHILLONG: A·gilsak gimikon mingsing minggamako man·gipa Shillong Chamber Choir-ni pianist aro dilgipa Neil Nongkynrih, Budbar attamo Mumbai songjinmani Reliance Hospital-o a·gilsakko watangaha.
Koborko on·ani gita, ua saaniko man·ani gimin re·anggipa 2021 bilsini November ja intalan Mumbai songjinmao done sannaniko man·engachim.
Sianggipa Nongkynrih-ni dilanichian Shillong Chamber Choir, 2010 bilsio ‘India’s Got Talent’ reality show-o chegipa ong·ahachim aro una agreba ia dol, a·gilsakni dingtang dingtang biaprangonaba re·ange gitrangko ring·ahachim.
Indake ong·engon, Neil Nongkynrih-ni sianina Meghalaya a·dokni Chief Minister Conrad Sangma aro gipin dilgiparangba kalimpaaniko parakattokaha.
“Mingsinggipa Shillong Chamber Choir-ni founder aro Padma Shri Neil Nongkynrih-ni tanggitik sianiko knasoe anga namen ka·a be·aha. India a·songo nambatsranggipa choir-ni dilgipako da·alo an·ching gimaatna nangaha. Uni nokdangna, Shillong Chamber Choir-ni membor-rangna aro a·song gimikon uko namnikgipa mande sakantinan anga angni kalimpaaniko on·enga, Uni janggi jringjrotnan tom·tomao neng·takchina,” ine uni siangani ja·man a·dokni Chief Minister, social media-o parakataha.
