SHILLONG: Meghalaya a·doko Omicron sabisini giproroaniko champengna gita ja·ku de·anio opposition membor-rangni ku·pattianirangkoba ra·na man·na gita tom·aniko ong·atchina Budbar salo a·dokni Congress dol, sorkariko didiangaha.
“Meghalaya a·doko obostarang namjabatangna skangan an·ching pilakan an·tangtangni ma·sianirangko ra·dime kamko ka·na nangenga. COVID-19 sajinmani a·selan batanggimin bilsignini gisepo a·dokni manderang namen neng·nikanirangko chagrongna nangtokaha,” ine Congress Legislature Party (CLP)-ni dilgipa Ampareen Lyngdoh parakataha.
Da·o dipet Omicron-na sample-rangko Kolkata-onasa watatna nangengani a·sel porikka ra·ani report-rangko man·anio bang·en somoi nangenga ine janapatengon, porikka ra·ani bewalko ta·rakbatatchina gita Lyngdoh didiangaha.
Porikka ra·ani report-rangko sal 10 ba sal 12-ni ja·manosa on·genchimode sabisi man·gipa manderangko dingtang donani somoiko name rakkina man·jawa aro jo·ongrangni jelroroaniko somoi gita champengna man·jawa ineba Lyngdoh aganaha.
“Da·al (Budbar) salsani gisepon sak 50 manderang a·doko COVID man·dapataiahani gimin ia sabisini giproroaniko champengna gita an·ching cholrangko bikotna nangenga. Batanggimin salgittamni gisepon an·chingo sak 32-oni da·o sak 50 man·daptaiaha,” ine CLP-ni dilgipa parakataha.
Da·onin mikrakbee kamko ka·sojagenchimode a·doko obostarang namjabatnaba gnang aro board porikkarangkoba somoi gita ong·atna man·janaba gnang ineba Lyngdoh aganaha.