TURA: Gital bilsiko ga·tapa bakan West Garo Hills a·jao COVID-19 man·gipa manderang Budbar salona kingking sak 20 gapdoangtaiaha.
Budbar salo Tura aro Dalu jolo gimik sak 9 manderang, COVID-19 man·dapaha aro uandaken da·o a·ja gimiko COVID-19 man·e dongenggiparang sak 20 gapdoangtaiaha.
Ia sak 9 manderangoni sakbride Tura Civil Hospital-o porikka ra·e positive ong·aha, saksade Chandmary testing centre-o porikka ra·e positive ong·aha aro sak 4-de Dalu CHC-o porikka ra·e positive ong·aha ine kobor on·aha.
West Garo Hills a·jao COVID-19 man·e dongenggipa sak 20 manderangoni sak 3-kode Tura Civil Hospital-o aro sak 17 manderangkode noktangtangon dingtang donenga ineba kobor on·aha.
Budbar salsani gisepo West Garo Hills a·jao mande saksa COVID-19 man·e nampilskana man·aha aro uandaken a·ja gimiko ia COVID-19-oni nampilgiparang gimik sak 7323 gapskaengaha.
