SHILLONG: Ri Bhoi a·jani Umling entry point-o manderangni apchangketaniko komiatna gita a·dok sorkari, ia entry point-o COVID-na porikka ra·ani centre-ko bariatna miksongenga.
A·dokni Health Minister James PK Sangma-ni parakatani gitade, ia sal somoirango gipin biaprangoni re·baenggipa pilak manderangkon entry point-rango porikka ra·e nisoengani gimin Umling entry point-oba porikka ra·na senge dongenggipa manderang bang·dugae neng·nikanirangko man·tokenga ine nikenba, ia entry point-o porikka ra·ani centre-ko baridapatna miksongenga.
“Manderangni apchangket ong·aniko komiatna gita chinga porikka ra·e niani centre-ko bariatna miksongenga. Centre-rangko kulidapani ja·manoba neng·nikanirangko dongaigen ine anga ma·sienga. Uni gimin iandakgipa obostani somoio sorkari baksa bakrimchina chinga manderangko mol·molenga,” ine Sangma aganaha.
Da·o dipet a·doko sakbonga manderang Omicron-ko man·aha ine janapatengon, iani bidingo sorkari gisiko nange kamko ka·enga ine Health Minister parakataha.
A·doko gital niamrangko ra·gate on·aha ineba Sangma parakataha.
“COVID-19-ni giproroaniko warachakna gita ia niamrangko ja·rikchina anga manderangko mol·molenga. An·ching mikrake dongako watgalkujana,” ine ua aganaha.