SHILLONG: Coronavirus-ni gital Omicron rokomko warachakna gita a·dokni Health & Family Welfare department, State Medical Expert Committee (MEC) aro State COVID Response Team baksa chanchirimenba, gital standard operating procedures (SOP) ba niamrangko ra·gatangaha.
Ia gital niamrangko ra·gatanio parakatani gitade, gital ge·etanirangko on·taikujaskal, entry point-rango chu·gimik tika su·gimin manderangkoba porikka ra·e niangkugen aro gipin biaprangoni re·baenggipa manderang, tika su·gimin ong·genchimoba konta 72-ni gisepo porikka ra·e nianio negative ong·gipa report-ko mesokna nanggen aro report donggijagiparangde porikka ra·e nina nanggen.
“Bilsi 15-na komikuenggipa bi·sarang, sabisini maming chinrang dongjagenchimode entry point-rango porikka ra·e nina nangjawa indiba COVID screening centre-rango porikka ra·e nienggipa manderang pilakan porikkani report-rangko man·kujaskal, noktangtango ba uamangni re·angenggipa biaprango an·tangtangan dingtang nape dongna nanggen,” ine Health department-ni on·gipa gital niamo parakataha.
Porikka ra·anio positive ong·gipa manderangde salsnina dingtang nape dongna gita nanggen aro hospital-rangoni watpilako man·na skang komibeoba salgittam skangde maming fever ba sabisini chinrang dongna gita nangjawa ineba gital niamo parakataha.
“Dingtang nape dongengmiting somoio positive ong·gipa pilak manderangan an·tangtangna simsakna nanggen aro dingtang dingtang chinrang, jekai rang·sisokja aro uandakgipa saanirang donggenchimode ta·raken sanna banani a·bao kam ka·enggiparangna u·iatna nanggen. Tika su·kugijagipa manderangan ia sabisina kenbatna nangenggiparang ong·ani gimin dingtang nape dongengmiting somoio salbongani ja·manoba maming namdapanirang dongjagenchimode ta·raken sanna banani a·bao kam ka·enggiparangna u·iatna nanggen,” ine gital niamrango parakataha.
Sabisiko man·e maming chin donggijagiparang aro sabisi man·gipa manderang baksa contact donggipa manderangba salbongana dingtang nape dongna nanggen aro uni ja·manba manderangni sepango ong·engon, salbongana mask-rangko ganjringna nanggen ineba gital niamrango parakataha.
Sorkari aro private hospital-rango dakna nanggnirangko janapatengon, hospital-rangona re·angenggipa manderango chinrang donggenchimosa COVID-na porikkarangko ra·e nina nanga ine gital niamrango parakataha.
Bilsi soke tika su·e ra·na chol man·enggipa pilakkon tika su·e ra·china gitaba Health department, didiattaiaha.