2023 election-ni ja·man a·doko Trinamool Congress gimagen: Congress

 

SHILLONG: Meghalaya a·doko All India Trinamool Congress (AITC)-ni dal·roroaniara altua katta ong·jawa aro re·baenggipa 2023 bilsini Assembly election ja·manode AITC gimaanggnok ine Bristibar salo Congress dol parakataha.

Iani bidingo kobor ra·timgipa manderang baksa agangrikengon, a·doko AITC bilakgipa dol ong·na man·jawa aro da·o mingsing minggamako man·engoba election-ni ja·mande gimaangaignok ine Congress dolni dilgipa PT Sawkmie parakataha.

Meghalaya a·dok gimiko bilakna gita AITC, bang·en somoiko nangkugen aro uamang a·doko namroro silroroaniko ra·bana miksongmanchaenga ine manderangna mesokchengna nanggen ineba Sawkmie parakataha.

Sawkmie-ni aganani gitade, re·anggipa bilsio Congress doloni ong·kate AITC-o napanggipa MLA-rang baksa apsan kamrangko ka·manahani gimin mikkang bilsiode election-ni ja·mano AITC gimaanggnok ine ua ma·sienga.

“Da·o dipet AITC, Garo Hills-o bilakgipa dol ong·engnaba gnang indiba Khasi aro Jaintia Hills a·jarangode manderang AITC-ko ra·chakna man·jawa aro election-oba AITC-na pu·ontokjawa,” ine Congress MLA aganaha.

Congress doloni ong·kate AITC-o napanggipa sak 12 MLA-rangni kosako ja·kuko de·ani gimin janapatengon, iani bidingo ja·kuko de·na gita Congress dolni dilgiparang, MPCC-ni president aro All India Congress Committee (AICC)-nasa pakwate donenga ine Sawkmie aganaha.

Re·anggipa bilsio a·dokni gitcham chief minister Dr Mukul Sangma-ko man·chape Congress dolni sak 12 MLA-rang, West Bengal a·dokni Chief Minister Mamata Banerjee-chi dilenggipa AITC-o napangani ja·man, ia MLA-rangko Assembly-o member ong·aoniko ra·galchina gita da·o CLP-ko dilenggipa Ampareen Lyngdoh, Assembly-ni Speaker-na badi ka·doangahachim indiba ia MLA-rangni kosako ja·kuko de·na gita Speaker jechakskaahachim.

Get real time updates directly on your device, subscribe now.

Comments are closed.