SHILLONG: South Garo Hills a·jao niam gri koelarangko badingna on·enga ine dingtang dingtang dolrang matnangatahani gimin iandake matnanganirang kakket ong·ama ong·ja, tale ma·sina gita uni sorkari am·sandigen ine Sombar salo, a·dokni Chief Minister Conrad Sangma, ku·rachakaniko on·angaha.
South Garo Hills a·jao badiaba badiaba company-rangna sorkari official-rang, koelarangko bikote salrurana on·enga ine Garo Hills-ni dingtang dingtang dolrang, a·dok sorkarina sedoatahani gimin Chief Minister, ia kattarangko aganaha.
NGO-rangni matnange seatgipa kattarangna aganchakaniko on·angengon, a·bachengonin sorkari, niak gri kam ka·giparangko champengna ja·ku de·enga aro koela bikotgipa aro koela salruraenggipa manderangni kosakoba rakgipa ja·kurangko de·china sorkari, deputy commissioner aro police department-na ge·etaniko on·manaha ine Chief Minister parakataha.
“Da·o dipet darangba niam gri koela bikotna aro koelarangko salrurana man·jawa. Nangchongmotgipa lekkarang donggipa truck garirang aro dolrangsan koelarangko salna man·aigen,” ine Sangma parakataha.
A·dokni gitcham chief minister aro All India Trinamool Congress (AITC)-ni dilgipa Mukul Sangma-ba South Garo Hills a·jani koela a·damrangona re·ange nieha aro uano niam gri koela bikotani aro koela salruraanirangko nikna man·aha ine Sombar salo AITC-ba social media-o parakatahachim.
Indake ong·engon, a·dokni badiaba biaprango niam gri koela bikotani ba koela badinganirang ong·enga ong·ode uarangko sorkari am·sandie nanga gita ja·kurangko de·gen ine Chief Minister parakatenba, iandake banoba niam gri kam ka·anirangko nikgenchimode sorkarina see u·iatchina gita a·doko songdongenggipa manderangkoba didiataha.
Adita salrangna skangsan, South Garo Hills a·jao niam gri koelarangko salrurana on·enga ine Garo Hills-oni AHAM aro CRF dolrangba, a·dokni Chief Secretary-na sedoatenba, South Garo Hills a·jao niam gri koela badinganiko ta·raken champengatchina gita didiatahachim ine nikna man·a.
Comments are closed.