TURA: Meghalaya a·dokoba COVID-19-ni Omicron batrikrikengahani gimin Garo Hills-ni dingtang dingtang biaprango dokkan dakenggipa manderangko, COVID-19-na dongimin niamrangko ja·rikchina aro dokkano asongtimenggipa pilak manderangkon mask ganchina gita Tura-ni Meghalaya Chamber of Commerce (MCC) mikrakataha.
MCC Tura-ni president Wilver Greham M Danggo-ni u·iatani gitade, Mongolbar salo MCC-ni membor-rang baksa West Garo Hills a·jani Deputy Commissioner Ram Singh, COVID-19-ko warachakna dongimin niamrangni bidingo Tura-ni DRDA hall-o tom·e chanchirimangenba, bazar antirango dokkan dakenggiparangko nirokchina ge·etaniko on·angahani gimin MCC-ni membor-rang, Garo Hills-o dokkan dakenggiparangko niam pe·jachina mikrakataniko on·skaenga.
“Uni gimin chinga West Garo Hills aro gipin a·jarango dokkan dakenggipa manderangko niam pe·jachina aro mask-rangko ganjringchina u·iatenga. Dokkanona re·baenggipa manderangkoba dokkano donggipa ba dokkan nokgiparangan ia niamrangko ja·rikchina didiskachina. Antisani gisepon district administration-ni official-rang, dingtang dingtang biaprangona re·e dokkan dakgiparangko nirok sandina sienga aro banoba mask gangija dokkan dakgiparangko nikgenchimode ua dokkan nokgiparang dairangko gamna nanggen,” ine MCC-ni president parakataha.
Ia kenbegnigipa sabisioniko an·tangtangko aro sakgipinrangkoba chel·chakna gita sorkarini dongimin niamrangko ja·rikna nangchongmota ineba ua parakataha.
