TURA: India a·song gimikon COVID-19-ni gital Omicron rokom giproroengahani gimin East Garo Hills a·jao songdongenggipa manderangna, ia kenbegnigipa sabisini bidingo mikrakataniko on·na gita East Garo Hills a·jani police-rang, manderangni bazar anti cha·gipa biaprango aro dingtang dingtang songrango awareness program-rangko ong·atenga.
Koborko on·ani gitade, Police headquarter-oniko ge·etaniko man·soenba, East Garo Hills a·jani ning·o donggipa Rongjeng, Songsak, Williamnagar aro Chiading police station-ni sipairang, an·tangtangni jolrango donggipa bazar antirang aro dingtang dingtang songrangona re·ange ia kenbegnigipa sabisini bidingo manderangna agan-talatanirangko on·enga aro an·tangtangko naljoke rakkina gita sorkarini ra·gatgimin niamrangko ja·rikchina didienga.
Indake ong·engon, re·baenggipa January-ni 26 tariko a·songni Republic Day-ko manina siengani gimin East Garo Hills a·jani dingtang dingtang biaprango nirok sandianirangko bilakdapataha ine East Garo Hills a·jani police officer-rang parakatenba, a·jao tom·tomaniko rakkiangna gita police-rangni kamo bakrimaniko on·china manderangko didiataha.