SHILLONG: January-ni 21 tariko Meghalaya a·dokni bilsi 50 gapaniko manina tarisamsoengon, a·dokni SSA skulrango skigiparangde, jagittamni dormaharangko man·jae neng·nikanirangko chagrongna nangtokskaengani gimin ia salo jingjengatanirangko dakskana manchiaha.
Koborko on·ani gitade, SSA skulrango skigiparangna sorkari, re·anggipa October jaoni December jaona jagittamni dormaharangko on·kujaengani gimin skigiparang, Meghalaya Day-ko maniani salo, nisan gisimko ra·e aro mombatirangko so·e jingjengatna manchiangaha.
Iani bidingo kobor ra·timgiparangna u·iataniko on·angengon, January-ni 21 tariko salni 12:00 bajioni attam 1:00 bajiona skigiparang, Khyndailad-o nisan gisimko ra·e jingjengatgen aro attamoba 5:30 bajioni ia apsan biapon mombatirangko so·e sorkarini kosako jegalanirangko dakanggen ine Meghalaya SSA Schools Association (MSSASA)-ni president Aristotle Rymbai parakataha.
Da·ororo COVID-19 batrikriktaiengahani gimin association-ni member sak 10-san ia jingjengatanio bakko ra·angaigen ineba Rymbai parakataha.
Rymbai-ni u·iatani gitade, uamangni Right To Information (RTI) ka·anio pangchake, re·anggipa bilsini November 9 tariko gong kror 59.34 tangkarangko aro December 22 tarikoba gong kror 73.51 tangkarangko ma·mong sorkari, SSA scheme-ni ning·o Meghalaya a·dokna chamataha ine uamang ma·sina man·aha indiba gong kror 52 tangkarangkosan a·doko man·soaiaha ine a·dokni Education Minister Lahkmen Rymbui-de a·kangskaahachim.
“Chingni Education Ministry-o RTI ka·e man·gipa aro Education Minister-ni agangipa tangkarang meligrikjahani gimin chinga namen aiao inmanbeaha,” ine MSSASA-ni president parakataha.
Chatro chatri sakprakna gong 600 ka·e Meghalaya a·dokni on·atgipa uniform grant-ni proposal-ko ra·chakahachim indiba gong 300 ka·esan uniform grant-ko ra·gataiaha ineba Rymbai aganaha.
SSA skulrango skigiparangna chu·gimik bangki dormaharangko on·kujaskal skigiparang, sorkari gipin kamrang, jekai COVID-ko warachakani, rongtal an·talatani aro uandakgipa kamrangko ka·jawa ineba Rymbai parakataha.
SSA skigiparangko kamo regularise ka·kujaengani gimin uamang, High Court-o badi ka·na miksongenga ineba MSSASA-ni president parakataha.