SHILLONG: Da·al January-ni 21 tariko Meghalaya a·dokko man·chengaoni bilsi 50 gapahaon, da·o bilsi 10-ni gisepon Meghalaya a·dokba a·songo nambatsranggipa dam 10 a·dokrangoni damsa ong·gnok ine Bristibar attamo, Meghalaya a·dokni Chief Minister Conrad Sangma parakataha.
Chief Minister-ni parakatani gitade, da·o bilsi 10-ni gisepon Meghalaya a·dokkoba a·songo nambatsranggipa dam 10 a·dokrangoni damsa ong·atna gita uni sorkari, dingtang dingtang kamrango namroro silroroaniko ra·bana kam ka·engaha.
MDA sorkarini chu·sokatna man·gipa kamrangni gimin janapatengon, a·doko ringani chirangko on·ani, lekka porako on·ani aro an·seng baljokaniko on·anio kamrang namdapna man·aha ine Chief Minister parakataha.
“Oe salgro salaramni gipin a·dokrang gitan chingaba tangka paisarangnade ma·mong sorkarion pangchakbatna nangaia indiba man·a dipetde chinga a·doktango man·enggipa cholrangchian namroro silroroaniko ra·bana jotton ka·enga maina chinga ma·mong sorkarini ra·gatgipa NSAP-ni namgnirangko Chief Minister’s Social Assistance Pension Scheme baksa chapatna man·aha aro PM Jan Arogya Yojana-koba a·doktangni Megha Health Insurance Scheme (MHIS) baksa chapatna man·aha. Chingni iandakgipa chanchisoe kamrangko ka·anichi ta·raken a·dok namroro silroroangna man·gen ine ka·dongenga,” ine Sangma aganaha.
MDA-o bakrimenggipa dingtang dingtang political dolrangni dakchakanichi Meghalaya a·doko kim·kimgipa sorkariko rikangkuna man·gen ineba Chief Minister, an·tangni ka·dongchakenganiko parakataha.
“Chinga Meghalaya Democratic Alliance (MDA)-o bakrimenggipa dolrang, dolsa dolgipinko ma·sichakgiparang ong·e a·dokni manderangna on·kange kamko ka·na man·aha aro bang·a kamrangkon chu·sokate on·na man·aha,” ine MDA sorkariko dilenggipa National People’s Party (NPP)-ni national president aganaha.
Meghalaya a·doko songdongenggipa pilak jatrangan ku·mong nangrime, a·dokni namgninan kamko ka·tokenga ineba Sangma aganaha.
Chief Minister-ni parakatani gitade, a·doko songdongenggipa dingtang dingtang jatrang ku·cholsan nangrime kamko ka·ahani a·selsa bilsi 50-na skangba Meghalaya a·dokko man·ahachim.
Meghalaya a·dokoniko Armed Forces (Special Powers) Act (AFSPA)-ko ra·galna man·aha gitan salgro salaramni gipin a·dokrangonikoba ia ka·namgijagipa niamko ra·galna gita rake kamko ka·angkugen ineba Sangma aganaha.