SHILLONG: Re·anggipa Sukrobar salo, Border Security Force (BSF) aro Meghalaya Police-ni sipairang apsan am·sandianirangko dakenba, South West Khasi Hills a·jani Borsora gita India-oni Bangladesh a·songona dakanggipa nalaoniko adita silchidarerangko man·aha.
Ia silchidare aro gulirangko, plastic bag rimito katepe donako police-rang man·aha aro ian USA a·songo tarigipa 0.38 revolver, magazine ge 2, rong 410 gulirang aro ge 35 EFC-rang ong·achim.
Ia silchidarerangko man·ani ja·mano sipairang, ua biaponiko metal detector-chi gipin bosturangkoba sandiangkuahachim indiba maming bosturangko man·dapjaha ine kobor on·aha.
Ia silchidarerangko BSF aro Meghalaya police-rang, international border-oni India a·song ning·chipak kilometre-samang chel·aoniko aro 193 Bn BSF-ni Borsora border outpost-oni km 1.5-mang chel·aoniko man·aha.
Iani bidingo FIR-ko ka·ani ja·man, silchidarerangko Borsora police station-na pakwate on·ataha.