M’laya a·doko National Voters’ Day-ko manianga

SHILLONG/TURA: India a·songni gipin biaprango gitan chang 12-gipa National Voters’ Day-ko Mongolbar salo, Meghalaya a·dokni dingtang dingtang biaprangoba maniangtokaha.

Shillong songjinmao ia salko Chief Electoral Officer-ni office-ni gita State Central Library Auditorium-o manidilangaha aro ia manianio Meghalaya sorkarini Chief Secretary V Suchiang, mongsonggipa sokgipa ong·e bakko ra·angaha. Shillong songjinmao National Voters Day-ko manianio a·dokni Chief Electoral Officer (CEO) FR Kharkongor, East Khasi Hills a·jani District Election Officer Isawanda Laloo, gipin sorkari officer-rang, dingtang dingtang skul aro college-ni dilgiparang, chatro chatrirang aro dingtang dingtang dolrangba bakko ra·angtokaha.

Shillong-o ia National Voters Day manianiko photo exhibition-ko oprakanichi a·bachengataha aro uni ja·man joljol Chief Secretary-ni dilanichi voters’ pledge ba pu·ongiparangni ku·mikchetaniko dakangaha.

Ia tom·anio a·dokni Chief Secretary, jinmana aganprakangengon, election-ni kamrango a·songo songdongenggipa mande sakantini bak ra·na nangani gimin aganangenba, bilsi sokgimin manderangko darangkoba electoral roll-rango biming watchanggaljana gita mande sakantinan iani gamchataniko u·iatchina gita bak ra·giparangko didiangaha.

Re·baenggipa 2023 bilsini gisepon a·dokni dam 60 Assembly constituency-ni ning·o donggipa dam 3335 polling station-rango election-ko ong·atani ong·taiengahani gimin da·o gita sajinmani somoio election-ko name ong·atna man·na gita kamrangko name ka·sochina gitaba ua Election department-ko didiangaha.

Ia salko manianio jinmana aganprakanggipa gipin manderangara, a·dokni CEO FR Kharkongor, East Khasi Hills a·jani Deputy Commissioner aro DEO Isawanda Laloo aro gipinrang ong·a.

Ia apsan salon, a·songni chang 12-gipa National Voters’ Day-ko Tura-ni DRDA Conference Hall-oba maniangaha aro ia salko manianio West Garo Hills a·jani Deputy Commissioner Ram Singh, mongsonggipa sokgipa ong·e voters’ pledge-ko dakdilangaha.

Ia salko manianio West Garo Hills a·jani Deputy Commissioner Ram Singh, jinmana aganprakangengon, kamtangtangko bimchipe ka·engani gimin booth level officer (BLO)-rangko mittelpilangenba, election-ni kamrangko chu·sokatanio BLO-rangan mongsonggiparang ong·a ine parakataha.

Polling station-rango dingtang dingtang cholrangko on·e aro butchuma budeparang baksana be·enni gita cholgri ong·gipa manderangba postal ballot-rangko on·na man·na gita nokantionaba kam ka·giparangko wate Election Commission, election-ni kamo pilakkon bak ra·atpana jotton ka·enga ineba ua aganaha.

Manderangna aro mongsongbate chadamberangna, voting rights ba pu·onna man·ani bilni gamchatani bidingo agan-talate on·na nangengani giminba ia tom·anio Singh aganangaha.
Ia salko manianio West Garo Hills a·jani Deputy Commissioner, Superintendent of Police (SP) VS Rathore aro 120 Bn CRPF-ni 2nd in Command Anil Kumar Singh-chi a·jani nambatgipa BLO-rangna aro 50 North Tura (ST), 51-South Tura (ST) baksana 52-Rangsakona LAC-ni ning·o gital biming segatgipa chadamberangna mande ra·pilskaanikoba dakangjolaha.

Gital biming segatgipa voter-rangna ia tom·anio dingtangmancha Sim Card-rangkoba indin suale on·angjolaha.

Ia tom·anio, BLO SVEEP Icon, Chichen B Sangma aro SVEEP Icon for PWD Darlingtone Ch Sangma-naba mande ra·pilskaaniko dakangaha.

Ia salo mande ra·pilskaaniko dakna gita seokako man·gipa BLO-rangara Bolarbita LP School-ni Assistant Teacher Ashraful Akand, Nayagaon LP School-ni Assistant Teacher Abdul Goffur Khan, Wakantagre UP School-ni Assistant Teacher Lankeshwar Koch, Chandmari LP School-ni Assistant Teacher Aldrin A Sangma, Modynagar LP School-ni Assistant Teacher Marshida M Sangma, Garobadha HS School-ni Assistant Teacher Iti N Marak, Marapara LP School-ni Assistant Teacher Kerinson M Marak aro Dalu Block-ni Gram Sevak Mohitosh Chanda ong·a.

Apsan daken, ia chang 12-gipa National Voters’ Day-ko North Garo Hills a·jaoba Mendipathar-ni Multi Purpose Cooperative Society Hall-o maniangaha aro ia salko manianio North Garo Hills a·jani Deputy Commissioner RP Marak, voters’ pledge-ko mingdilangaha.

Ia salko manianio North Garo Hills a·jani Deputy Commissioner RP Marak, jinmana aganprakangengon, mamingnaba kenani gri, maming torom ba jat baseani gri aro darangni ropanirangko knachaka grian dilgipako seokanio bak ra·e a·songna on·gimin bilko chu·sokatchina gita tom·anio bak ra·giparangko didiangaha.

Election-ni kamrango bang·bata manderangko bak ra·atna man·na gita election-ni bidingo manderangna u·iatna nangengani giminba Marak aganangaha.

North Garo Hills a·jao election-ni bewalo COVID-ni tikarangko su·anichi tika su·aniko bariatna man·ahani gimin ua dingtangmancha ia special vaccination campaign-o bak ra·gipa official-rangkoba mittelpilangaha.

Ia salko manianio BLO Icon-rang baksana electoral roll-rango gital biming segatgipa chadamberangnaba mande ra·pilskaaniko dakangjolaha.

East Garo Hills a·jaoba ia chang 12-gipa National Voters’ Day-ko Williamnagar-ni DC office-o donggipa Multi Purpose Hall-o maniangaha aro ia salko manianio East Garo Hills a·jani Deputy Commissioner Swapnil Tembe, mongsonggipa sokgipa ong·e bakko ra·angenba, voters’ pledge ba pu·ongiparangni ku·mikchetaniko dakdilangaha.

Ia salko manianio East Garo Hills a·jani Deputy Commissioner Swapnil Tembe, jinmana aganprakangengon, bilsiantian January-ni 25 tariko Election Commission of India (ECI)-ni foundation day-ko maniani bak gita National Voters’ Day-ko a·song gimikon manienga ine talataniko on·angaha.

Ia National Voters’ Day-ko maniani mongsonggipa miksonganiara, election-ni kamrango bak ra·china gita chadamberangko didina aro bilsi 18 gapgimin chadamberangko electoral roll-rango biming segatchina didina manianian ong·enga ineba Tembe parakataha.

Ia salko manianio East Garo Hills a·jani Election SVEEP Icon aro re·anggipa bilsio Uttarakhand-o ong·atanggipa National Open Taekwondo Championship-o gold medal-ko man·bagipa Anilbath Sangma-na mande ra·pilskaaniko dakangjolaha.

Iana agreba, electoral roll-rango gital biming segatgipa chadamberangnaba ia salko manianio dingtangmancha mande ra·pilskaaniko dakangaha.

caption:

East Garo Hills a·jao National Voters’ Day-ko manianio skulo poraienggipa chatro chatrirang gitko ring·enga.

Get real time updates directly on your device, subscribe now.

Comments are closed.