TURA: South Garo Hills a·jani sima ari jolrango donggipa manderang baksa meli-nangrime donganiko rakkiangna gita re·anggipa Sombar salo, 55 Battalion Border Security Force (BSF) dolni gita civic action program-ko South Garo Hills a·jani Dipulipara Border Outpost (BOP)-o ong·atangaha.
Ia civic action program-ko ong·atanio BSF dolni gita dingtang dingtang bosturang, jekai solar system inverter, non-electric water filter, kal·susaani bosturang aro uandakgipa ma·manti bosturangko, South Garo Hills a·jani Silbari, Dabram, Dipulipara, Sibbari, Namchapara, Kapasipara, Netri, Damdama, Jankhol aro Gasuapara songni manderangna suale on·angaha.
Ia civic action program-ni bak gita dingtangmancha cultural program-koba ong·atangaha, jeon jolo donggipa dingtang dingtang skulni chatro chatrirang bakko ra·angtokaha.
Ia program-ko ong·atanio dongpae bakko ra·anggipa mongsonggipa manderangara, South Garo Hills a·jani Deputy Commissioner FM Dopth, 55 Bn BSF-ni Commandant KN Tripathi, 100 Bn BSF-ni Commandant AK Tiwari, BSF-ni gipin official-rang, songni nokni Nokmarang, skigiparang, chatro chatrirang aro gipinrang ong·a.