SHILLONG: Assam aro Meghalaya a·dokni simarango meligrikna man·jaenggipa biaprangoni damdok jolrangko skanggipa bako namatchengna a·dok damgnini sorkarirang ja·kuko de·engon, ia damdok jolrangni bidingo a·dok damgnini chief minister-rangan 98 percent-ni gitade songgrikaniko dakmanaha ine Bristibar salo, Meghalaya a·dokni Chief Minister Conrad Sangma parakataha.
Chief Minister-ni parakatani gitade, a·dok damgnini chief minister-rangko Union Home Minister Amit Shah, bakan okamattaigen ine ka·dongsoengani gimin matchotgija dongkuenggipa kamrangkoba matchotatna gita Bristibar salo Meghalaya Cabinet tom·e chanchirimangaha.
“A·dok damgnini simarango meligrikna man·jaenggipa damdok jolrangni bidingo anga aro Assam-ni chief minister sakgnian 98 percent-ni gitade songgigrikmanaha aro bangki dongkuenggipa kamrangkoba chinga bakan matchotatna ka·dongenga,” ine Sangma aganaha.
Union Home Minister-ko grongetaiani bidingo sing·on, ia jani bon·angachibara ong·jaode mikkang jani a·bachengachibara a·dok damgnini chief minister-rangko Union Home Minister okamatnaba gnang aro una skang matchotgija dongenggipa bangki biaprangni giminba a·dok damgnini chief minister-rang chanchirime matchotatna jotton ka·gnok ine Chief Minister aganaha.
“Chingko Union Home Minister bakan okamattaigen ine chinga ka·dongengani gimin una skang anga Assam-ni Chief Minister Himanta Biswa Sarma-ko gronge agangriktaigen aro ua somoion chinga matchotgija dongenggipa kamrangni giminba chanchirimgen,” ine ua aganaha.
Adita salrangna skangsan Assam-ni Chief Minister Himanta Biswa Sarma aro Meghalaya a·dokni Chief Minister Conrad K Sangma, New Delhi-ona re·angenba, regional committee-rangni on·gipa ku·pattianirangko Union Home Minister Amit Shah-na u·iatskaeahachim.
