TURA: West Garo Hills a·jani Haripuri Namabilla Higher Secondary School-o niam gri Science skigiparangko kamo rakkina jotton ka·a ine matnanganiko skulni principal jegalatenba, ian maming pangchakani gri matnanganirangsan ong·aia ine talataniko on·angaha.
West Garo Hills a·jani Haripur Namabilla Higher Secondary School-na skigiparangko ra·anio niamrangko pe·aha ine adita salrangna skangsan, School Managing Committee-ni gitcham president Jamial Hoque matnangatenba, skigiparangko kamo rakkina gita ong·atgipa interview-ko gale gital ong·attaichina Shillong-o donggipa School Education & Literacy-ni Director-na sedoatahachim.
An·tangni kosako matnanganirangna skulni principal Hadisul Islam, talataniko on·angskaengon, ia skigiparangko niamo pangchake aro DSEO-ni on·gimin bilko man·esa ra·aha ine parakataha.
Ia kamna advertisement ba u·iataniko skulni principal an·tangarisa on·aiaha ine matnanganiko jegalatengon, skulo skigiparangko rakkidapchina gita chatro chatrirang mol·molahani giminsa ua skanggipa DSEO baksa tom·aniko ong·ate resolution-ko ra·enba ja·mano ia resolution-ko official an·tangan ra·chakchengaha ine skulni principal parakataha. Candidate-rangko Interview Board-ni gitasa seokaha aro ia board-o DSEO an·tangan bak ong·a ineba ua parakataha.
SMC-ko songchenggija skigiparangko rakkiani gimin Hoque-ni sing·doanina aganchakaniko on·angengon, skulo skigiparangko seokna nangchongmotaha indiba COVID-19-ni a·sel SMC-kosa songna man·kujaengachim ine skulni principal parakataha.
