SHILLONG: Assam-ni kaenggipa Kulsi dam-ni kosako jegalchrakaniko dakaigija aro an·tangtangarin bon·ataina am·aigija, technical team-ni sandie man·anirangko sengchina gita Deputy chief minister,in-charge power, Prestone Tynsong jingjengataenggipa songni manderangko mol·molaha.
Brahmaputra Board-ni Kulsi Dam project, jekon Assam Kamrup district aro West Khasi Hills aro Ri-Bhoi district-ni golmal gnanggipa sima ario kaengachim, ian dam 35 songni manderangna neng·nikaniko ra·bagen ine kenchakenba ia anti a·bachengao bang·a manderang ong·katgrime jegalanirangko dakangahachim.
“Da·o manchamanchade anga mamingkoba aganna nangnikkujaenga. Technical team-an na·simangna che·em che·em talate on·china, indake jensomoio na·simang nama namgijaniko nikgen, namnikja ong·ode uano ong·kate ia project-ko jegalna man·gen, uasa mongsonggipa,” Tynsong aganaha.
Tynsong indakeba u·iata je re·anggipa bang·gija salrangna skango water resources department-oni dolsa project rikenggipa biapona sandiroke nina gita re·angaha aro bebegita ia dam-ko kaode badia badia songrangko sripgenchim, ua biaprangkoba nieaha.
“Badita biaprangko sripgen aro bditana bilding bildang ong·tokgenchim, uarangko nigrikenba daito ra·gipa dilgiparangna talate on·bachina gita chinga official-rangko watataha,” ua aganaha.
Minister in-charge power indakeba agana, “agangrikaniko dakanio bang·a dilgiparangan project-ni kosako namgnikgijaniko agantokaha, ukoba anga ma·sia.”
Bijoli bikotna gita Kyrshai jolo Brahmaputra Board-ni gita Assam sorkarini kaatenggipa hydro-electricity project-ko dam 35 songni manderang skang 2019 bilsionin jegalbaenga.
Khri chibimao dam project-ko rikna gita No-objection Certificate (NOC)-ko on·jachina ine Meghalaya Sorkario dabienba songni manderang, NGO-rang aro jolni dilgiparang re·anggipa February 1 tariko Rambrai-Jyrngam-ni ning·ogipa Kyrshai-o jingjengataniko dakangahachim.
