SHILLONG: Meghalaya a·doko niam gri koela bikote salruraenga ine matnanganirangko jakgitele am·sandiatchina gita Bharatiya Janata Party (BJP) aro United Democratic Party (UDP) dolrangni dabiangani ja·man, Meghalaya Democratic Alliance (MDA)-o bakrimenggipa dolrangoni Nationalist Congress Party (NCP) dolba, iandake matnangenggipani bidingo jakgitele am·sandianiko dakchina dabiangaha.
BJP, UDP aro NCP dolgittaman, NPP-chi dilenggipa MDA sorkario bakrimenggipa dolrang ong·a ine nikna man·a.
“Niam gri koela badinganiko jakgitele am·sandiatchina BJP aro UDP dolrang dabiaha. An·chingo niam gri koela badinganiko nirokna National Green Tribunal (NGT) donga indiba uamang baditana kingking kamrangko ka·enga an·ching ma·sija. Uni gimin iandake matnanganirangko jakgitelgipa bimangchi am·sandina man·genchimode nambatgen,” ine NCP-ni state president Saleng A Sangma parakataha.
A·doko koela bikotanirangko NGT-an nirokenga ine sorkari agangipani gimin janapatengon, a·doko koela bikotanirangko NGT-ba nirokaichina indiba niam gri koela badingani bidingo matnanganirangko jakgitelgipa agency-rangchi am·sandiskachina ine Sangma aganaha.
“A·doko niam gri koela badingenga ine matnanganirangko jinmana parakna man·na gita aro MDA sorkarini kosako matnanganirang name rongtalsrangchina gita gipin a·dokoni dolrang re·bae am·sandianirangko dakchina,” ine NCP-ni state president aganaha.
Meghalaya a·doko niam gri koelarangko bikote salruraenga ine dingtang dingtang dolrang matnangtokengani gimin, kakketko ma·sie ra·na man·na gita ta·raken iani bidingo CBI gita dakgipa independent agency-rangchi am·sandiatchina BJP aro UDP dolrang dabiangahachim ine nikna man·a.
