TURA: Garo Hills Autonomous District Council (GHADC)-na ma·mong sorkarini chamatgipa tangka paisarangko aro gipin kajinarangko name jakkalchina gita dingtang dingtang NGO-rangni nangrime bikotgipa All Garo Hills Joint Action Committee (AGHJAC) didiangenba, an·tangni ku·rachakgimin gita GHADC-o kam ka·enggiparangni dormaharangko on·na man·jagenchimode kamtangko watchina GHADC-ni gital chief executive membor (CEM) Rakesh A Sangma-ko dabiangaha.
GHADC-ko tangatpiltaina gita Garo Hills-o songdongenggipa pilak manderangkon ku·cholsan ong·e kamko ka·china didiangengon, Garo Hills-o songdongenggipa manderangna tom·tomani aro namroro silroroaniko ra·bana man·na gita pilak A·chik MLA, MP aro ja·delgimin manderangkon apsan nangrime ja·ku de·china gita AGHJAC didiataha.
GHADC-o seoka man·gipa membor-rangko name kam ka·china didiangengon, A·chik a·songni namroro silroroanina an·tangtangni ku·rachakgimin pilak kamrangkon chu·sokate on·china AGHJAC, MDC-rangko didiangaha.
A·chikrangni bil aro daka rikanirangko ripinge rakkianio dilgiparangni dakna nanggni kamrangni giminba AGHJAC gisik ra·atpilaniko on·angaha.
GHADC-o kraa gita niamrangko ra·gatchina didiangengon, kragipa niamrangko ra·gatjagenchimode mikkangchi A·chikrangni gisepon meligrikgijanirang ong·katnaba gnang ina AGHJAC, mikrakataniko on·angaha.
Garo Customary Law (GCL)-ko ta·raken ra·chakenba, niam pil·atna nangengani giminba AGHJAC, a·dok sorkari aro GHADC-ni pilak seoka man·gimin membor-rangna gisik ra·atpilaniko on·angaha.
Nokmarangna on·gimin bil aro kamrangko bilakbatatchina didiangengon, GHADC-na ta·raken dingtang electoral roll-ko ra·gatchina gitaba AGHJAC didiangaha.