GHADC-ni gital CEM, election-na skangsa ‘A Sangma’ de·a ine NGO-rang matnanga

 

TURA: Garo Hills Autonomous District Council (GHADC)-ni gitcham chairman Rakesh A Sangma-ko chief executive membor (CEM) songanina jegalanirang batroroengon, ua 2020 bilsini GHADC election-na skangmangmangsan an·tangko ‘A Sangma’ de·ahani gimin maming dakeba GHADC-ni CEM ine ra·chakna man·jawa ine Garo Hills-ni dingtang dingtang dolrang, chong·motan GSU, FKJGP, ADE, FAF, AYWO aro NESO dolrang parakataha.

CEM-ni kosako jegalenggipa NGO-rangni parakatani gitade, GHADC-ni gital CEM Rakesh A Sangma, skulo poraia gimikan an·tangni bimingko ‘Rakesh Newar’ inesa seachim aro college-o napangani ja·man ‘Newar Sangma’ ine seenba GHADC election-na skangmangmangsan, an·tangko Rakesh A Sangma ine affivadit ka·ahachim.

“GHADC election-o uni susagipa 7-Babelapara Constituency-ara mongsongbate A·chik aro gipin Tribal jatrang bang·batani giminsa ua an·tangko A·chik ine mesokna iako dakaha ine chinga chanchichipenga,” ine NGO-rang parakataha.

Rakesh-ni ma·gipa ‘A·gitok’ Maharian ong·genchimoba, uni nokdangni manderangde skangonin A·chikrangni dakrongbewal gita me·chikchiko ra·giparang ong·jachim ineba NGO-rang parakataha.

“A·chikni niamode bia ka·ani ja·man pangnan me·asarangde noktangko wate jikni nokosa dongna gita nangachim indiba Rakesh Newar Sangma aro uni jonggipade, jiktangtangkosa ma·a paaoniko ma·ekate an·tangtangni ma·a paa baksa dongatskaaha. Iasan ong·agija Rakesh Newar Sangma aro uni nokdangde skangonin A·chikrangni daka rikako ja·rikbagiparang ong·ja aro A·chikrangni niamko name ma·sigiparangba ong·ja. Iako janapengon, chinga uko ba uni nokni manderangko chonnikna miksonge aganenga ong·ja indiba uko GHADC-ni CEM songanina chingni jegalaniko talatna miksongesa janapatenga,” ine NGO-rang parakataha.

District council-ni CEM-an jatni pilak kamrangon bil donggipa ong·ani giminsa uamang Rakesh A Sangma-ni CEM ong·aniko jegalenga ineba NGO-rang talataniko on·angaha.

“A·kingko nirokenggipa Nokmarangkoba CEM-sa songna bil donga, a·king damgnini gisepo maiba meligrikgijani donggenchimoba uko CEM-sa bichal ka·na man·a, Nokmani bilna meligrikgijanikoba CEM-sa bichal ka·na aro rai on·na bil donga, badiaba ma·chongni gital a·kingna ge·etanikoba CEM-sa on·na bil donga aro uandaken dingtang dingtang kamrangon CEM-ara bil donggipa ong·a,” ine NGO-rang parakatenba, GHADC-ni CEM-an A·chik ong·jagenchimode maikai iandakgipa bilrangko jakkalna man·gen ine sing·doangaha.

Rakesh Sangma-ko GHADC-ni CEM songaniko ra·galpilchina a·dokni dilgiparangko aro mongsongbate Garo Hills-ni dilgiparangko didiangengon, ua an·tangan an·tangni daitoko ma·sie kamtangko watchina gita NGO-rang, Rakesh Sangma-ko didiataha.

February 8 tarik attamoni Garo Hills gimikon night road blockade ba walni somoio rama champengataniko ong·atenga ine parakatengon, Rakesh Sangma-ko CEM-ni kamoniko ra·galpilkujaskal ba ua an·tangan kamtangko watpilkujaskal, Garo Hills gimikon jingjengataniko dongtongkujawa ine NGO-rang mikrakataniko on·angaha.

Get real time updates directly on your device, subscribe now.

Comments are closed.