Rakesh-ko democracy-ni bewalon CEM-na seoka: Conrad

SHILLONG: Rakesh A Sangma-ko GHADC-ni CEM-na seokaniko NGO-rangni jegalgrimengani gimin aganengon, Council-ni gital CEM-ko democracy-ni bewalon seokaha ine Chief Minister, Conrad K. Sangma Sombaro chel·chake aganaha.
“Anga iako rongtalen agana je CEM-ko seokanio chingni maming dangdikpaani dongja. MDC-rang an·tangtangan Rakesh Sangma-ko de·e mesokaha” ine Pa Sangma, koborni manderangna Sombaro aganaha.
Unomitingo, Chief Minister indakeba aganaha je GHADC-o da·omitingo neng·nikanirangko bang·en chagrongenga.
Council-ko kim·kimatna gita cholrangko dakna nangchongmotenga ine aganengon, GHADC-ko chalaianio pilakni gitan namdapataniko ra·bana gita manderang aro MDC-rang pilakn melie kamrangko ka·na nangenga ine Pa Sangma aganaha.
Indakeba nikatna man·enga je Rakesh Sangma-ko GHADC-ni gital CEM-na seokaniko Garo Hills-ni NGO-rang raken jegaltokenga.
GSU, FKJGP, ADE, FAF, AYWO aro NESO-ni a·kange aganani gitade, Rakesh aro uni ba·rimarang uamangni skul re·mitingo an·tangtangko ‘Newar’ inesa ra·a ‘A Sangma’ ine ra·ja, jekon ja·mano college-ona soko Newar Sangma ine mingjitaha. GHADC election-nasan ua affidavit ka·enba Rakesh A Sangma ine an·tangni bimingko mingjitaha ineba NGO-rang a·kange aganaha.

Get real time updates directly on your device, subscribe now.

Comments are closed.